"كتبوها بالدم"
في ذكرى الثورة المصرية
من يومنا نكتبها
بالدم
مش بحروف
واليوم كأنه دهر
مفرود ما بين عمرين
وغريب يا لون الفجر
من بدري غايب فين؟!
ليك زهوه غير ما كنت
ليك طعم مش مألوف
صليت
وقولت يارب
حررني من صمتي
واحميني شر الخوف
حسيت كأني ميدان
واسع على أخره
تعبان ومش تعبان
والذل جاب أخره
حسيت بأني ضريح
لهزايم الشعرا
حسيت كأني نهار
هتافات رايات ثوار
دا لأني شفت الله
بالقلب
مش بالشوف
محسوبكم الشاعر
قضى سنين شاعر
بالذل والحيرة
فما بالك ان غنيت
للندل والداعر
أنا كنت
بكتبلك
م العالم النامي
العالم النايم
العالم المحدوف
من يومي بكتبلك
بالدم
مش بحروف
يا عم
يا مصلي
دعاك بيوصلي
على الأدان كبر
دا وطن بيتحرر
من قبضة اﻷفعى
سحر السياسه بطل
والحيرة مش نافعة
من يومى أكتبها
بالدم
مش بحروف
مصر الوطن
والناس
دى ثورة مش أزمة
ماتمنعوش الخير
بكلام مالوش لازمه
تمن الحياه دى كبير
والشهدا
كتبوها
بالدم
مش بحروف!!
ليست هناك تعليقات:
إرسال تعليق